Skammsýni á tímum tæknibyltingar, erum við að missa af framtíðinni?

Við lifum á tímum þar sem mannkynið stendur frammi fyrir stærstu og hraðfleygustu tæknibyltingu sögunnar. Örar framfarir í gervigreind eru þegar farnar að gerbreyta vinnumörkuðum, efnahagskerfum, menntakerfum og sjálfum grunnstoðum samfélagsins. Þessi þróun er ekki framtíðarmúsík, hún er að gerast hér og nú. Hún krefst algjörrar endurhugsunar á því hvernig við skipuleggjum ríki, innviði, löggjöf og menntun til framtíðar. Samt sem áður virðist íslensk pólitík vera pikkföst í hjólförum fortíðarinnar. Á meðan heimurinn umbyltist í kringum okkur, eyðum við dýrmætum tíma, fjármunum og pólitískri orku í deilur sem hafa staðið nánast óbreyttar í áratugi.

 

Mesta áhyggjuefnið í íslenskri stjórnmálaumræðu í dag er sú staðreynd að hún snýst enn að stórum hluta um aðildarviðræður við Evrópusambandið. Við rífumst endalaust um hvort það eigi að „kíkja í pakkann“, ganga til beinna aðildarviðræðna eða loka á þær endanlega. Þetta sýnir gríðarlega skammsýni, bæði í íslenskri samfélagsumræðu og í samhengi við heimspólitíkina. Á meðan stórveldi heimsins og alþjóðleg tæknifyrirtæki keppast við að ná yfirhöndinni í gervigreindartækni og móta leikreglur framtíðarinnar, sitjum við föst í gömlum skotgröfum. Evrópusambandið sjálft á í fullu fangi með að átta sig á eigin stöðu, samkeppnishæfni og flóknu reglugerðarverki gagnvart þessari nýju tækni, en hér heima ræðum við málin eins og heimurinn hafi ekkert breyst síðustu tuttugu árin.

 

Sem lögmaður sé ég daglega hvernig tæknin er að breyta starfsháttum, úrlausn mála og lagaumhverfinu öllu. Gervigreindin mun stýra því hvernig ákvarðanir eru teknar, hvernig fyrirtæki starfa, hvernig upplýsingum er miðlað og hvernig réttindi borgaranna eru tryggð eða skert. Sú spurning hvort Ísland standi framarlega í þessari þróun eða verði aðeins óvirkur neytandi er miklu örlagaríkari fyrir sjálfstæði okkar og efnahagslega velsæld en gamlar pólitískar línur. Við þurfum stjórnmálamenn sem lyfta höfðinu upp úr dægurþrasinu, skilja þessa risavöxnu áskorun og þora að horfa fram á við.

 

Við þurfum framtíðarsýn sem snýst um hvernig við undirbúum íslenskt samfélag undir tæknivædda framtíð. Það þarf að ræða nýsköpun af alvöru, endurskoðun menntakerfisins, siðfræði gervigreindar, persónuvernd og hvernig við verndum íslenska hagsmuni, tungumál og menningu í stafrænum heimi þar sem landamæri skipta sífellt minna máli. Í stað þess að ræða hvernig við getum nýtt tæknina til að auka framleiðni og bæta lífskjör á Íslandi, virðist pólitíkin haldin ákveðinni tregðu til að takast á við hið nýja.

 

Það er dýrkeypt að láta gamlar pólitískar deilur skyggja á stærstu áskorun samtímans. Heimspólitíkin er að breytast og valdahlutföll hliðrast til vegna tæknilegra yfirburða, en ekki vegna þess hverjir sitja við samningaborð í Brussel. Ef við höldum áfram að horfa í baksýnisspegilinn í stað þess að horfa fram á veginn, munum við dragast aftur úr öðrum þróuðum þjóðum. Íslensk pólitík verður að vakna og átta sig á því hvar raunverulegu breytingarnar eru að eiga sér stað. Framtíðin er þegar mætt og hún ætlar ekki að bíða eftir því að við klárum að rífast um Evrópusambandið.

 

Höfundur: Sævar Þór Jónsson, hæstaréttarlögmaður.

< Eldri pistlar

Nýrri pistlar >

Framúrskarandi fyrirtæki 2026

Eftir Sævar Þór Jónsson • 21. ágúst 2026
Sævar Þór og Partners er annað árið í röð meðal þeirra 2% íslenskra fyrirtækja sem standast öll skilyrði í greiningarvinnu Creditinfo og hefur verið útnefnt Framúrskarandi fyrirtæki 2026. Við erum afar stolt yfir að hljóta þessa viðurkenningu á nýjan leik og þakklát okkar samhenta teymi og þeim fjölmörgu viðskiptavinum sem treysta okkur fyrir krefjandi verkefnum. Framúrskarandi fyrirtæki er vottun Creditinfo til þeirra íslensku fyrirtækja sem byggja starfsemi sína á traustum stoðum og hafa náð framúrskarandi árangri í rekstri.

Sólhestar saka MAST um ósanngjarna málsmeðferð

Eftir Sævar Þór Jónsson • 20. ágúst 2026
Ekki leið langur tími á milli þess að MAST sendi boðun um stöðvun á starfsemi Sólhesta og fallið var frá henni.  Stöðvunin hafði verið boðuð þann 25. mars en var dregin til baka þann 10. apríl sl. Í millitíðinni hafði Sævar Þór Jónsson hæstaréttarlögmaður sent MAST andmæli við stöðvuninni fyrir hönd Sólhesta „Í samskiptum mínum við MAST var þeim bent á að umbjóðendur mínir, sem höfðu þá tiltölulega nýlega tekið við rekstrinum, voru að fara út í miklar breytingar sem þá þegar voru hafnar. MAST fór í úttekt á því og komst að þeirri niðurstöðu að sú væri raunin,“ segir Sævar Þór. Hér má lesa nýlega frétt á RÚV um málið.

Árangur í Héraðsdómi: Úrskurður um gjaldþrotaskipti felldur úr gildi

Eftir Sævar Þór Jónsson • 19. ágúst 2026
Nýverið féll athyglisverður úrskurður í Héraðsdómi Reykjaness þar sem dómstóllinn féllst á kröfu um endurupptöku gjaldþrotamáls og felldi öll réttaráhrif fyrri úrskurðar úr gildi. Sævar Þór Jónsson , lögmaður og eigandi stofunnar, gætti hagsmuna fyrirtækisins í málinu. Málið átti rætur að rekja til þess að Skatturinn hafði krafist gjaldþrotaskipta á hendur félaginu vegna vanskila á ársreikningum, og var úrskurður þess efnis kveðinn upp í kjölfar útivistar. Eftir að Sævar Þór tók að sér hagsmunagæslu fyrir félagið var lagt fram ítarlegt erindi þar sem sýnt var fram á að ársreikningum hefði nú verið skilað og vanskilin leiðrétt. Þá var sýnt fram á að félagið væri fyllilega greiðslufært og fært um að standa við allar skuldbindingar sínar.  Í úrskurði sínum féllst dómstóllinn á röksemdir lögmannsins. Var staðfest að þar sem forsendur vanskila væru brostnar og skilyrðum um greiðslugetu fullnægt, væru ríkar ástæður til að endurupptaka málið og fella réttaráhrif gjaldþrotsins niður. „Þessi niðurstaða sýnir hversu mikilvægt það er að bregðast hratt og rétt við ef upp koma flókin ágreiningsefni við stjórnvöld. Við fögnum því að dómstólar hafi fallist á okkar röksemdir og að rekstur félagsins geti haldið áfram óhindraður,“ segir Sævar Þór Jónsson lögmaður. Hjá Lögmannsstofu Sævars Þórs Jónssonar & Partners leggjum við ríka áherslu á harðfylgna og faglega hagsmunagæslu fyrir fyrirtæki í rekstrarvanda.